Беларусам па-ранейшаму няпроста перасякаць мяжу з Літвой. Так, працягваюць дзейнічаць абмежаванні на ўезд аўто з беларускімі нумарамі, пасажырскія чыгуначныя зносіны паміж краінамі цалкам спыненыя, а колькасць аўтобусных рэйсаў скарацілася. Журналіст «Люстэрка» пагаварыў з дэпутатам Сейма Літвы Русланасам Баранавасам пра тое, ці варта беларусам чакаць якіх-небудзь зменаў найбліжэйшым часам.
Ці ёсць перспектывы аслаблення або скасавання абмежаванняў на ўезд у Літву для грамадзян Беларусі? Дэпутат Сейма на гэтае пытанне адказаў адмоўна.
— Сёння няма такой перспектывы, — заявіў Русланас Баранавас. — Сітуацыя з бяспекай толькі ўскладняецца. Вы самі разумееце, што ёсць рызыкі, якія ідуць ад рэжыму Лукашэнкі.
Што да магчымасці аднаўлення пасажырскага чыгуначнага руху паміж Беларуссю і Літвой, Баранавас таксама не бачыць для гэтага перадумоваў у найбліжэйшай будучыні.
— Цяпер гэтае пытанне не абмяркоўваецца. Рэжым Лукашэнкі спрабаваў выйсці з прапановай наконт гэтага. Але Літва не зацікавілася. Наколькі я ведаю, нашая чыгунка таксама не лічыць аднаўленне пасажырскага руху выгадным. З Вільнюса ў Мінск цяпер ездзіць аўтобусаў больш, чым у Каўнас або любы іншы горад Літвы.
Пры гэтым Русланас Баранавас адзначыў, што скарачэнне колькасці аўтобусных рэйсаў з Літвы ў Беларусь, якое адбылося ў жніўні, не было палітычным рашэннем. Ён сцвярджае, што гэта звязана выключна з эканамічнай мэтазгоднасцю.
— Рэйсаў і так было шмат. Гэта чыстая эканоміка, — заявіў Баранавас.
Ён таксама расказаў, што ў літоўскім Сейме абмяркоўваліся папраўкі, якія маглі б яшчэ больш узмацніць правілы перасячэння мяжы і атрымання ВНЖ для беларусаў, аднак яны не былі прынятыя. Паводле Баранаваса, адной з прычын такіх прапановаў сталі частыя паездкі некаторых беларусаў на радзіму.
— Ёсць адна праблема: вельмі шмат людзей атрымалі гуманітарны від на жыхарства ў Літве, заявіўшы, што ў Беларусі ім пагражае небяспека. А потым яны перасякаюць мяжу назад-наперад па 11 разоў за год. Значыць, не так ім і небяспечна ў Беларусі, раз яны так часта ездзяць, — адзначыў дэпутат.
Пры гэтым ён падкрэсліў, што прынятыя раней абмежаванні — не рашэнне на ўсё жыццё, а мера, якая пераглядаецца штогод.
— Мы кожны год прымаем гэтую папраўку, і яна год і дзейнічае. Цяпер гэта будзе вясной. Калі нічога там, як кажуць, у глабальным маштабе не зменіцца, — растлумачыў Баранавас.
Чытайце таксама
